Ian & Stuart's Australian Mac: Not for Sale/Another.not.for.sale (Australia).iso/hold me in your arms/nanomius/quat/cent6

Text File | 1994-04-29 | 22KB | 603 lines

                    CENTVRIE VI.
                  ----------------

                         I.
        Avtour des monts Pyrenees grans amas
       De gent estrange secourir Roy nouueau:
       Pres de Garonne du grand temple du Mas,
      Vn Romain chef le craindra dedans l'eau.

                         II.
       En l'an cinq cens octante plus & moins,
        On attendra le siecle bien estrange:
   En l'an sept cens, & trois cieux en tesmoings,
   Que plusieurs regnes vn a` cinq feront change.

                        III.
    Fleuue qu'esprouue le nouueau nay de Celtique
        Sera en grande de l'Empire discordes
      Le ieune prince par gent ecclesiastique,
       Ostera le sceptre coronal de concorde.

                         IV.
        La Celtiq fleuue changera de riuage,
        Plus ne tiendra la cite' d'Agripine:
       Tout transmue' hormis le vieil langage,
        Saturne, Leo, Mars, Cancer en rapine.

                         V.
         Si grand famine par vnde pestifere.
     Par pluye longue le long du polle arctiques
       Samatobryn cent lieux de l'hemisphere,
       Viuront sans loy exempt de pollitique.

                         VI.
           Apparoistra vers le Septentrion
      Non loing de Cancer l'estoille cheuelue:
           Suze, Sienne, Boe"ce, Eretrion,
      Mourra de Rome grand, la nuict disperue.

                        VII.
        Norneigre Dace, & l'Isle Britannique,
         Par les vnis freres seront vexees:
        Le chef Romain issu de sang Gallique
        Et les copies aux forests repoussees.

                        VIII.
      Ceux qui estoient en regne pour sc,auoir,
       Au Royal change deuiendront appouuris:
          Vns exilez sans appuy or n'auoir,
     Lettrez & lettres ne seront a` grand pris.

                         IX.
    Aux sacrez temples seront faicts escandales,
      Comptez seront par honneurs & lou"anges:
    D'vn que on graue d'argent d'or les medalles,
       La fin sera en tourmens bien estranges.

                         X.
      Vn peu de temps les temples des couleurs
       De blanc & noir des deux entre meslee:
      Rouges & iaunes leur embleront les leurs,
    Sang, terre, peste, faim, feu d'eau affollee.

                         XI.
     Des sept rameaux a` trois seront reduicts,
      Les plus aisnez seront surprins par mort,
        Fratricider les deux seront seduicts,
        Les coniurez en dormans seront morts.

                        XII.
       Dresser copies pour monter a` l'empire,
          Du Vatican le sang Royal tiendra:
       Flamans, Anglois, Espagne auec Aspire,
        Contre l'Italie & France contiendra.

                        XIII.
        Vn dubieux ne viendra loing du regne,
       La plus grand part le voudra soustenir.
      Vn Capitole ne voudra point qu'il regne,
        Sa grande charge ne pourra maintenir.

                        XIV.
      Loing de sa terre Roy perdra la bataille,
      Prompt eschappe' poursuiuy suiuant prins,
         Ignare prins soubs la doree maille,
      Soubs feinct habit, & l'ennemy surprins.

                         XV.
      Dessoubs la tombe sera trouue' le Prince,
        Qu'aura le pris par dessus Nuremberg:
        L'espaignol Roy en capricorne mince,
       Feinct & trahy par le grand Vvitemberg.

                        XVI.
          Ce que rauy sera de ieune Milue,
        Par les Normans de France & Picardie:
      Les noirs du temple du lieu de Negrisilue
         Feront aulberge & feu de Lombardie.

                        XVII.
        Apres les limes bruslez le rasiniers,
       Contrains seront changer habits divers:
      Les Saturnins bruslez par les meusniers,
        Hors la pluspart qui ne sera couuers.

                       XVIII.
      Par les Phisiques le grand Roy delaisse',
      Par sort non art de l'Ebrieu est en vie,
       Luy & son genre au regne haut pousse',
       Grace donnee a` gent qui Christ enuie.

                        XIX.
         La vraye flamme engloutira la dame,
       Qui voudra mettre les Innocens a` feu:
       Pres de l'assaut l'exercite s'enflamme,
    Quant dans Seuille monstre en boeuf sera veu.

                         XX.
         L'vnion feincte sera peu de duree,
        Des vn changez reformez la pluspart:
       Dans les vaisseaux sera gent endurees,
         Lors aura Rome vn nouueau Liepart.

                        XXI.
      Quant ceux du polle arctic vnis ensemble,
        Et Orient grand effrayeur & craints:
      Esleu nouueau, soustenu le grand tremble,
       Rodes, Bisence de sang Barbare teincte.

                        XXII.
      Dedans la terre du grand temple celique,
     Nepueu a` Londre par paix feincte meurtry:
        La barque alors deuiendra scimatique,
        Liberte' feincte sera au corn' & cry.

                       XXIII.
        D'esprit de regne munismes descrie's,
      Et seront peuples esmeuz contre leur Roy,
    Paix sainct nouueau, sainctes loix empirees,
          Rapis onc fut en si tredur arroy.

                        XXIV.
       Mars & le scepte se trouuera conioinct,
         Dessoubs Cancer calamiteuse guerre:
        Vn peu apres sera nouueau Roy oingt,
       Qui par long temps pacifiera la terre.

                        XXV.
        Par Mars contraire sera la monarchie,
        Du grand pescheur en trouble ruyneux;
       Ieune noir rouge prendra la hirarchie,
         Les proditeurs iront iour bruyneux.

                        XXVI.
    Quatre ans le siege quelque peu bien tiendra,
          Vn suruiendra libidineux de vie:
       Rauenne & Pyse, Veronne soustiendront,
        Pour esleuer la croix de Pape enuie.

                       XXVII.
       Dedans les Isles de cinq fleuues a` vn,
       Par le croissant du grand Chyren Selin:
      Par les bruynes de l'air fureur de l'vn,
        Six eschapez cachez fardeaux de lyn.

                       XXVIII.
       Le grand Celtique entrera dedans Rome,
           Menant amas d'exilez & bannis:
     Le grand Pasteur mettra a` mort tout homme,
      Qui pour le coq estoyent aux Alpes vnis.

                        XXIX.
      La vefue saincte entendant les nouuelles,
      De ses rameaux mis en perplex & trouble:
       Qui sera duict appaiser les querelles,
       Par son pourchas de razes fera comble.

                        XXX.
       Par l'apparence de faincte sainctete',
          Sera trahy aux ennemis le siege.
       Nuict qu'on cuidoit dormir en seurete',
      Pres de Brabant marcheront ceux du Liege.

                        XXXI.
        Roy trouuera ce qu'il desiroit tant,
        Quand le Prelat sera reprins a` tort:
       Responce au Duc le rendra mal content,
      Qui dans Milan mettra plusieurs a` mort.

                       XXXII.
        Par trahison de verges a` mort battu,
       Prins surmonte' sera par son desordre:
       Conseil friuole au grand captif sentu,
     Nez par fureur quant Berlch viendra mordre.

                       XXXIII.
       Sa main derniere par Alus sanguinaire,
          Ne se pourra par la mer garentir:
     Entre deux fleuues craindre main militaire,
          Le noir l'ireux le fera repentir.

                       XXXIV.
           De feu voulant la machination,
      Viendra troubler au grand chef assieger:
             Dedans sera telle sedition,
        Qu'en desespoir seront les profligez.

                        XXXV.
      Pres de Rion, & proche a` blanche laine,
       Aries, Taurus, Cancer, Leo, la Vierge,
     Mars, Iupiter, le Sol ardera grand plaine,
       Bois & citez lettres cachez au cierge.

                       XXXVI.
       Ne bien ne mal par bataille terrestre,
        Ne paruiendra aux confins de Perouse,
       Rebeller Pise, Florence voir mal estre,
     Roy nuict blesse' sur mulet a` noire house.

                       XXXVII.
          L'oeuure ancienne se paracheuera,
       Du toict cherra sur le grand mal ruyne:
          Innocent faict mort on accusera,
         Nocent cache, taillis a` la bruyne.

                      XXXVIII.
         Aux profligez de paix les ennemis,
            Apres auoir l'Italie superee,
        Noir sanguinaire, rouge. sera commis,
       Feu, sang verser, eau de sang coloree.

                       XXXIX.
      L'enfant du regne, par paternelle prinse
           Expolier sera pour le deliurer:
        Aupres du lac Trasimen l'axur prinse,
     La troupe hostage par trop fort s'enyurer.

                         XL.
    Grand de Magonce pour grande soif esteindre,
         Sera priue' de sa grande dignite':
   Ceux de Cologne si fort le viendront plaindre,
      Que la grand groppe au Rhin sera iette'.

                        XLI.
         Le second chef du regne d'Annemarc,
       Par ceux de Frize & l'Isle Britannique,
       Fera despendre plus de cent mille marc,
         Vain exploicter voyage en Italique.

                        XLII.
          A Logmyon sera laisse' le regne,
         Du grand Selin plus fera de faict:
        Par les Itales estendra son enseigne,
         Regi sera par prudent contrefaict.

                       XLIII.
         Long temps sera sans estre habitee,
      Ou` Signe & Marne autour vient arrouser:
           De la Tamise & martiaux tentee,
      De ceux les gardes en cuidant repousser.

                        XLIV.
       De nuict par Nantes Lyris apparoistra,
        Des arts marins susciteront la pluye:
      Vrabiq goulfre, grande classe parfondra,
     Vn monstre en Saxe naistra d'ours & truye.

                        XLV.
        Le gouuerneur du regne bien sc,auant,
        Ne consentir voulant au faict Royal:
        Mellile classe par le contraire vent
          Le remettra a` son plus desloyal.

                        XLVI.
           Vn iuste sera en exil renuoye',
      Par pestilence aux confins de Nonseggle,
         Response au rouge le fera desuoye',
        Roy retirant a` la Rame & a` l'Aigle.

                       XLVII.
     Entre deux monts les deux grands assemblez.
        Delaisseront leur simulte' secrette:
       Brucelle & Dolle par Langres accablez,
       Pour a` Malignes executeur leur peste.

                       XLVIII.
       La sainctete' trop feinte & seductiue,
          Accompagne' d'vne langue diserre:
       La cite' vieille, & Parme trop hastiue,
     Florence & Sienne, rendront plus desertes.

                        XLIX.
        De la partie de Mammer grand Pontife,
          Subiuguera les confins du Danube:
     Chasser la croix, par fer raffe' ne riffe,
    Captifs, or, bague plus de cent mille rubes.

                         L.
        Dedans le puys seront trouuez les os,
       Sera l'inceste, commis par la maratre:
       L'estat change', on querra bruit & los,
       Et aura Mars atrendant pour son astre.

                         LI.
     Peuple assemble', voir nouueau expectacle.
       Princes & Roys par plusieurs assistans,
     Pilliers faillir, murs: mais comme miracle
         Le Roy sauue' & trente des instans.

                        LII.
        En lieu du grand qui sera condamne',
        De prison hors, son amy en sa place:
    L'espoir Troyen en six mois ioins, mort ne',
   Le Sol a` l'vrne seront peins fleuue en glace.

                        LIII.
      Le grand Prelat Celtique a` Roy suspect,
      De nuict par cours sortira hors de regne:
     Par Duc fertile a` son grand Roy Bretaine,
        Bisance a` Cypres & Tunes insuspect.

                        LIV.
      Au poinct du iour au second chant du coq,
         Ceux de Tunes, de Fez, & de Bugie,
        Par les Arabes, captif le Roy Maroq,
       L'an mil six cens & sept, de Liturgie.

                         LV.
       Au chalme' Duc en arrachant l'esponce,
      Voile Arabesque voir, subit descouuerte:
       Tripolis, Chio, & ceux de Trapesconce,
      Duc prins, Marnegro & la cite' deserte'.

                        LVI.
         La crainte armee de l'ennemy Narbon
         Effrayera si fort les Hesperidues:
       Parpignan vuide par l'aueugle d'arbon,
       Lors Barcelon par mer donra les piques.

                        LVII.
      Celui qu'estoit bien auant dans le regne,
       Ayant chef rouge proche a` hierarchie,
       Aspre & cruel, & se fera tant craindre,
           Succedera a` sacre' monarchie.

                       LVIII.
         Entre les deux monarques esloignez,
      Lors que le Sol par Selin clair perdue",
        Simulte' grande entre deux indignez,
      Qu'aux Isles & Sienne la liberte rendue".

                        LIX.
         Dame en fureur par rage d'adultere,
     Viendra a` son Prince coniurer non de dire:
         Mars bref cogneu sera la vitupere,
         Que seront mis dixsept a` martyre.

                         LX.
       Le Prince hors de son terroir Celtique
          Sera trahy, deceu par interprete:
      Rou"ant, Rochelle par ceux de l'Armorique
    Au port de Blaue deceus par moyne & prestre.

                        LXI.
         Le grand tappis plie' ne monstrera,
     Fors qu'a` demy la pluspart de l'histoire:
      Chasse' du regne loing aspre apparoistra,
   Qu'au faict bellique chacun le viendra croire.

                        LXII.
   Trop tard tous deux les fleurs seront perdues,
       Contre la loy serpent ne voudra faire:
     Des ligueurs forces par gallots confondues,
     Sauone, Albingue par monech grand martyre.

                       LXIII.
          La dame seule au regne demeuree.
      D'vnic esteint premier au lict d'honneur:
         Sept ans sera de douleur exploree,
      Puis longue vie au regne par grand, heur.

                        LXIV.
        On ne tiendra pache aucune arreste',
         Tous receuans iront par tromperie:
     De paix & trefue, & terre & mer proteste'.
       Par barcelone classe prins d'industrie.

                        LXV.
         Gris & bureau demie ouuerte guerre,
         De nuict seront assaillis & pillez:
        Le bureau prins passera par la serre,
     Son temple ouuert, deux au plastre grillez.

                        LXVI.
         Au fondement de la nouuelle secte,
       Seront les os du grand Romain trouuez,
      Sepulchre en marbre apparoistra couuerte,
       Terre trembler en Auril, mal enfou"etz.

                       LXVII.
      Au grand Empire paruiendra tout vn autre,
          Bonte' distant plus de felicite':
       Regi par vn issu non loing du peautre,
         Corruer regnes grande infelicite'.

                       LXVIII.
         Lors que soldats fureur seditieuse.
     Contre leur chef feront de nuict fer luire:
        Ennemy d'Albe soit par main furieuse,
       Lors vexer, Rome, & principaux seduire.

                        LXIX.
      La pitie' grande sera sans loing tarder,
  Ceux qui do^noyent seront contraints de pre^dre:
      Nuds Affamez de froid, soif, soy bander,
    Les monts passer commettant grand esclandre.

                        LXX.
       Au chef du monde le grand Chyren sera,
      Plus outre apres ayme, criant, redoute':
        Son bruit & los les cieux surpassera,
      Et du seul tiltre victeur fort contente'.

                        LXXI.
       Quand on viendra le grand Roy parenter
        Auant qu'il ait du tout l'ame rendue:
        Celuy qui moins le viendra lamenrer,
     Par Lyons, aigles, croix couronne vendue".

                       LXXII.
        Par fureur feinte d'esmotion diuine,
         Sera la femme du grand fort violee:
        Iuges voulans damner telle doctrine,
         Victime au peuple ignorant immolee.

                       LXXIII.
         En cite' grande vn moyne & artisan,
       Pres de la porte logez & aux murailles,
         Contre Moderne secret, caue disant
   Trahis pour faire sous couleur d'espousailles.

                       LXXIV.
           La dechassee au regne tournera,
          Ses ennemis trouuez des coniurez:
        Plus que iamais son temps triomphera,
       Trois & septante a` mort trop asseurez.

                        LXXV.
        Le grand pillot par Roy sera mande',
  Laisser la classe pour plus haut lieu atteindre:
          Sept ans apres sera contrebande',
       Barbare armee viendra Venise craindre.

                       LXXVI.
         La cite' antique d'antenoree forge,
         Plus ne pouuant le tyran supporter
      Le manche feinct au temple couper gorge,
     Les siens le peuple a` mort viendra bouter.

                       LXXVII.
        Par la victoire du deceu fraudulente,
       Deux classes vne, la reuolte Germanie,
      Le chef meurtry & son fils dans la tente,
      Florence, Imole pourchassez dans Romaine.

                      LXXVIII.
      Crier victoire du grand Selin croissant:
        Par les Romains sera l'Aigle clame',
          Tiecin Millan et Genes y consent,
      Puis par eux mesmes Basil grand reclame'.

                       LXXIX.
        Pres de Tesin les habitans de Loire,
       Garonne, Saone, Saine, Tain & Gironde,
       Outre les monts dresseront promontoire.
      Conflict donne' Par granci, sumerge onde.

                        LXXX.
    De Fez le regne paruiendra a` ceux d'Europe,
         Feu leur cite' & l'anne tranchera.
    Le grand d'Asie terre & mer a` grand troupe,
    Que bleux, peres, croix, a` mort dechassera.

                       LXXXI.
    Pleurs cris & plaints heurlemens, effrayeur,
        Coeur inhumain, cruel, Roy & transy.
       Leman les Isles, de Gennes les maieurs,
        Sang espacher, fromfaim a` nul mercy.

                       LXXXII.
      Par les deserts de lieu libre & farouche,
       Viendra errer nepueu du grand Pontife:
      Assomme' a` sept auecques lourde souche,
       Par ceux qu'apres occuperont le Cyphe.

                      LXXXIII.
       Celuy qu'aura tant d'honneur & caresse.
         A son entree de la Gaule Belgique.
        Vn temps apres sera tant de rudesses,
      Et sera contre a` la fleur tant bellique.

                       LXXXIV.
      Celuy qu'en Sparte Claude ne peut regner,
          Il fera tant par voye seductiue:
        Que du court, long, le fera araigner,
         Que contre Roy fera sa perspectiue.

                       LXXXV.
        La grand'cite' de Tharse par Gaulois.
       Sera destruite, captifs tous a` Turban:
        Secours par mer au grand Portugalois,
       Premier d'este' le iour du sacre Vrban.

                       LXXXVI.
      Le grand Prelat vn iour apres son songe,
         Interprete' au rebours de son sens:
       De la Gascogne luy suruiendra vn monge,
      Qui fera eslire le grand prelat de Sens.

                      LXXXVII.
          L'election faicte dans Frankfort,
         N'aura nul lieu, Milan s'opposera:
     Le sien plus proche semblera si grand fort,
       Qu'outre le Rhin e's mareschs cassera.

                      LXXXVIII.
          Vn regne grand demourra desole',
       Aupres de l'Hebro se feront assemblees:
        Monts Pyrenees le rendront console',
     Lors que dans May seront terres tremblees.

                       LXXXIX.
      Entre deux cymbes pieds & mains attachez,
     De miel face oingt, & de laict substante',
       Guespes & mouchez, fitine amour fachez
          Poccilateur faucer, Cyphe tente'.

                         XC.
           L'honnissement puant abominable
            Apres le faict sera felicite'
        Grand excuse pour n'estre fauorable,
         Qu'a` paix Neptune ne sera incite'.

                        XCI.
         Du conducteur de la guerre nauale,
       Rouge effrene', suere, horrible grippe,
     Captif eschappe' de l'aisne' dans la baste:
     Quand il naistra du grand vn fils Agrippe'.

                        XCII.
           Prince de beaute' tant venuste,
        Au chef menee, le second faict trahy.
     La cite' au glaiue de poudre, face aduste,
     Par trop grand meurtre le chef du Roy hay.

                       XCIII.
          Prelat autre d'ambition trompe',
        Rien ne sera que trop viendra cuider:
         Ses messagers & luy bien attrape',
     Tout au rebours voit qui les bois fendroit.

                        XCIV.
          Vn Roy ire' sera aux sedifragues,
     Quand interdicts feront harnois de guerre:
     La poison taincte au succre par les fragues
    Par eaux meurtris, morts, disant serre serre.

                        XCV.
        Par detracteur calomnie a` puis nay,
      Quand istront faicts enormes & martiaux:
        La moindre part dubieuse a` l'aisnay,
      Et tost au regne seront faicts partiaux.

                        XCVI.
         Grande cite' a` soldats abandonnee,
         On n'y eu mortel tumult si proche:
      O qu'elle hideuse mortalite' s'approche,
        Fors vne offence n'y sera pardonnee.

                       XCVII.
        Cinq & quarante degrez ciel bruslera
        Feu approcher de la grand cite' neuue
        Instant grand flamme esparse sautera
      Quand on voudra des Normans faire preuue.

                       XCVIII.
    Ruyne' aux Volsques de peur si fort terribles
     Leur grand cite' taincte, faict pestilent:
      Piller Sol, Lune & violer leurs temples:
     Et les deux fleuues rougir de sang coulant.

                        XCIX.
         L'ennemy docte se trouuera confus.
     Grand camp malade, & defaict par embusches,
  Mo^ts Pyrenees & Poenus luy sero^t faicts refus,
    Proche du fleuue descouurant antiques roches.

        LEGIS CANTIO CONTRA INEPTOS CRITICOS
     Quos legent hosce versus mature` censunto,
      Profanum vulgus & inscium ne attrectato:
  Omnesq; Astrologi, Blennis, Barbari procul sunto,
        Qui aliter facit, is rite sacer esto.